ٹی ٹوئنٹی ورلڈکپ میں کارکردگی اچھی تھی، رن ریٹ پر آؤٹ ہوئے
کراچی: سابق کپتان محمد رضوان نے کہا ہے کہ ٹی ٹوئنٹی ورلڈکپ میں پاکستان کی کارکردگی مجموعی طور پر اچھی رہی، تاہم رن ریٹ کی وجہ سے ٹیم ٹورنامنٹ سے باہر ہو گئی۔
کراچی میں پریکٹس سیشن کے دوران میڈیا سے گفتگو کرتے ہوئے محمد رضوان نے سری لنکا کے میچ کا حوالہ دیتے ہوئے کہا کہ وہ میچ برا نہیں کہہ سکتے کیونکہ آخرکار ٹیم نے اسے جیت لیا۔ انہوں نے مزید کہا کہ کرکٹ میں ایسی صورتحال اکثر پیش آتی ہے، مثال کے طور پر زمبابوے نے آسٹریلیا کو ہرا دیا تھا، اس لیے یہ کہنا درست نہیں کہ ایک ٹیم کمزور یا کسی اور ٹیم سے کم تر ہے۔
بھارت کے انگلینڈ کے خلاف سیمی فائنل میں کارکردگی کے بارے میں سوال کے جواب میں محمد رضوان نے کہا، “معذرت، میں بھارت کا میچ نہیں دیکھتا۔”
اسی دوران، ٹیم پر جرمانے کے حوالے سے سوال پر محمد رضوان نے کہا کہ جرمانے میڈیا کی وجہ سے ہوئے کیونکہ ٹیم کے بارے میں اچھا برا دکھانے کا زیادہ دباؤ انہی کی جانب سے تھا۔
