اسلام آباد:
سپریم کورٹ نے سرکاری ملازمین کی پروموشن سے متعلق کیس میں اہم فیصلہ سناتے ہوئے قرار دیا ہے کہ اہل ملازم کو پہلی محکمہ جاتی پروموشن کمیٹی (ڈی پی سی) کے انعقاد کے دن سے پروموشن کا حق حاصل ہے۔
عدالت عظمیٰ نے پنجاب سروس ٹربیونل کا فیصلہ کالعدم قرار دیتے ہوئے سرکاری ملازم فخر مجید کی پروموشن 21 جنوری 2012 سے مؤثر بحال کر دی۔ سپریم کورٹ نے واضح کیا کہ انتظامی تاخیر یا غفلت کی سزا کسی صورت ملازم کو نہیں دی جا سکتی۔
سات صفحات پر مشتمل تحریری فیصلہ جسٹس عائشہ ملک نے جاری کیا، جبکہ کیس کی سماعت جسٹس عائشہ ملک، جسٹس محمد ہاشم کاکڑ اور جسٹس اشتیاق ابراہیم پر مشتمل بینچ نے کی۔
فیصلے میں کہا گیا کہ پروموشن سرکاری ملازمین کا بنیادی حق ہے اور اداروں پر لازم ہے کہ وہ بروقت ڈی پی سی کا انعقاد یقینی بنائیں، تاکہ اہل ملازمین کو ان کے جائز حق سے محروم نہ کیا جا سکے۔
