لندن میں منشیات اسمگلنگ کیس: 21 سال قید پانے والی سدرہ نوشین کی سیاسی سرگرمیوں پر بحث
لندن کی عدالت کی جانب سے ہیروئن اسمگلنگ کے مقدمے میں 21 سال قید کی سزا پانے والی سدرہ نوشین سے متعلق نئی تفصیلات سامنے آ گئی ہیں، جن میں ان کی ماضی کی سیاسی سرگرمیوں کا بھی ذکر کیا جا رہا ہے۔
تفصیلات کے مطابق، برطانوی عدالت کے فیصلے میں بتایا گیا کہ سدرہ نوشین سے مجموعی طور پر 85 کلوگرام ہیروئن برآمد ہوئی، جس پر انہیں طویل قید کی سزا سنائی گئی۔ عدالتی ریکارڈ کے مطابق، ملزمہ ہیروئن کو مختلف طریقوں سے منتقل کر کے برطانیہ کے شہر برڈفورڈ لے جاتی تھی، جہاں سے اسے مزید پھیلایا جاتا تھا۔
میڈیا رپورٹس اور سوشل میڈیا پر گردش کرنے والے مواد کے مطابق، سدرہ نوشین ماضی میں پاکستان تحریک انصاف (پی ٹی آئی) کی بعض سیاسی سرگرمیوں میں شرکت کرتی رہی ہیں۔ تصاویر اور ویڈیوز میں انہیں پارٹی کے جلسوں اور مظاہروں میں دیکھا جا سکتا ہے، تاہم سیاسی وابستگی کی نوعیت پر مختلف آرا سامنے آ رہی ہیں۔
سدرہ نوشین کو سزا سنائے جانے کے بعد سوشل میڈیا پر اس معاملے پر بحث شروع ہو گئی ہے، جہاں صارفین نے بیرونِ ملک پاکستانیوں کے کردار، پاکستان کے تشخص اور عالمی سطح پر امیج سے متعلق سوالات اٹھائے ہیں۔
ذرائع کے مطابق، برطانوی حکام اس کیس کو منظم جرائم کے تناظر میں دیکھ رہے ہیں اور ملزمہ کے ممکنہ بین الاقوامی روابط کی بھی تحقیقات کی گئی ہیں۔ سدرہ نوشین کو یہ سزا 23 دسمبر کو سنائی گئی تھی۔
یہ واقعہ نہ صرف برطانیہ میں منشیات کے خلاف کارروائیوں کی اہم مثال ہے بلکہ پاکستان میں سیاسی اور سماجی حلقوں میں بھی مختلف زاویوں سے زیرِ بحث ہے۔
